ปฐมธมฺมสํคีติ

[1]

ปญฺจเนตฺโต ชิโน ปญฺจ-จตฺตาลีสสมา’สโม;

ฐตฺวา สพฺพานิ กิจฺจานิ, กตฺวา โลกสฺส สพฺพถาฯ

[2]

กุสินารายยมก-สาลานมนฺตเร วเร;

เวสาขปุณฺณมายํ โส, ทีโป โลกสฺส นิพฺพุโตฯ

[3]

สงฺขฺยาปถมติกฺกนฺตา, ภิกฺขู ตตฺถ สมาคตา;

ขตฺติยา พฺราหฺมณา วสฺสา, สุทฺธา เทวา ตเถว จฯ

[4]

สตฺตสตสหสฺสานิ, เตสุ ปาโมกฺขภิกฺขโว;

เถโร มหากสฺสโปว, สงฺฆตฺเถโร ตทา อหุฯ

[5]

สตฺถุสรีรสารีร-ธาตุกิจฺจานิ การิย;

อิจฺฉนฺโต โส มหาเถโร, สตฺถุ ธมฺมจิรฏฺฐิติํฯ

[6]

โลกนาเถ ทสพเล, สตฺตาหปรินิพฺพุเต;

ทุพฺภาสิตํ สุภทฺทสฺส, พุทฺธสฺส วจนํ สรํฯ

[7]

สรํ จีวรทานญฺจ, สมตฺเต ฐปนํ ตถา;

สทฺธมฺมฐปนตฺถาย, มุนินา’นุคฺคหํ กตํฯ

[8]

กาตุํ สทฺธมฺมสํคีติํ, สมฺพุทฺธานมเต ยติ;

นวงฺคสาสนธเร, สพฺพงฺคสมุปาคเตฯ

[9]

ภิกฺขู ปญฺจสเตเยว, มหาขีณาสเว วเร;

สมฺมนฺนิ เอเกนูเน ตุ, อานนฺทตฺเถรการณาฯ

[10]

ปุน อานนฺทตฺเถรา’ปิ, ภิกฺขูหิ อภิยาจิโต;

สมฺมนฺนิ กาตุํ สํคีติํ, สา น สกฺกา หิ ตํ วินาฯ

[11]

สาธุกีฬนสตฺตาหํ, สตฺตาหํ ธาตุภาชนํ;

อิจฺจทฺธมาสํ เขเปตฺวา, สพฺพโลกานุกมฺปกาฯ

[12]

วสฺสํ วสํ ราชคเห, กสฺสาม ธมฺมสงฺคหํ;

นาญฺเญหิ ตตฺต วตฺถพฺพ-มิติ กตฺวาน นิจฺฉยํฯ

[13]

โสกาตุรํ ตตฺถ ตตฺถ, อสฺสาเสนฺโต มหาชนํ;

ชมฺพุทีปมฺหิ เต เถรา, วิจริตฺวาน จาริกํฯ

[14]

อาสฬฺหิสุกฺกปกฺขมฺหิ, สุกฺกปกฺขฐิตตฺถิกา;

อุปาคมุํ ราชคหํ, สมฺปนฺนจตุปจฺจยํฯ

[15]

ตตฺเถว วสฺสูปคตา, เต มหากสฺสปาทโย;

เถรา ถิรคุณูเปตา, สมฺพุทฺธมตโกวิทาฯ

[16]

วสฺสานํ ปฐมํ มาสํ, สพฺพเสนาสเนสุ’ปิ;

กาเรสุํ ปฏิสงฺขารํ, วตฺวานา’ชาตสตฺตุโนฯ

[17]

วิหารปฏิสงฺขาเร, นิฏฺฐิเต อหุ ภูปติ;

อิทานิ ธมฺมสํคีติํ, กริสฺสามิ มยํ อิติฯ

[18]

กตฺตพฺพํ กินฺติปุฏฺฐสฺส, นิสชฺชฐานมาทิสุํ;

ราชา กตฺถาติ ปุจฺฉิตฺวา, วุตฺตฐานมฺหิ เตหิ โสฯ

[19]

สีฆํ เวภารเสลสฺส, ปสฺเส กาเรสิ มณฺฑปํ;

สตฺตปณฺณิคุหาทฺวาเร, รมฺมํ เทวสโภปมํฯ

[20]

สพฺพถา มณฺฑยิตฺวา ตํ, อตฺถราเปสิ ตตฺถ โส;

ภิกฺขูนํ คณนาเยว, อนคฺฆตฺถรณานิ จฯ

[21]

นิสฺสาย ทกฺขิณํ ภาคํ, อุตฺตรามุขมุตฺตมํ;

เถราสนํ สุปญฺญตฺตํ, อาสิ ตตฺถ มหารหํฯ

[22]

ตสฺมิํ มณฺฑปมชฺฌสฺมิํ, ปุรตฺถมุขมุตฺตมํ;

ธมฺมาสนํ สุปญฺญตฺตํ, อโหสิ สุคตารหํฯ

[23]

ราชา’โรจยิ เถรานํ, กมฺมํ โน นิฏฺฐิตํ อิติ;

เต เถรา เถรมานนฺท-มานนฺทกรมพฺรวุํฯ

[24]

สฺเว สนฺนิปาโต อานนฺท, เสเขน คมนํ ตหิํ;

น ยุตฺตนฺเต สทตฺเถ ตฺวํ, อปฺปมตฺโต ตโต ภวฯ

[25]

อิจฺเจวํ โจทิโต เถโร, กตฺวาน วีริยํ สมํ;

อิริยาปถโต มุตฺตํ, อรหตฺตมปาปุณิฯ

[26]

วสฺสานํ ทุติเย มาเส, ทุติเย ทิวเส ปน;

รุจิเร มณฺฑเป ตสฺมิํ, เถรา สนฺนิปติํสุ เตฯ

[27]

ฐเปตฺวา’นนฺทตฺเถรสฺส, อนุจฺฉวิกมาสนํ;

อาสเนสุ นิสีทิํสุ, อรหนฺโต ยถารหํฯ

[28]

เถโร’รหตฺตปตฺติํ โส, ญาเปตุํ เตหิ นาคมา;

กุหิํ อานนฺทตฺเถโร’ติ, วุจฺจมาเน ตุ เกหิจิฯ

[29]

นิมฺมุชฺชิตฺวา ปถวิยา, คนฺตฺวา โชติปเถน วา;

นิสีทิ เถโร อานนฺโท, อตฺตโน ฐปิตาสเนฯ

[30]

อุปาลิเถโร วินเย, เสสธมฺเม อเสสเก;

อานนฺทตฺเถรมกรุํ, สพฺเพ เถรา ธุรนฺธเรฯ

[31]

มหาเถโร สกตฺตานํ, วินยํ ปุจฺฉิตุํ สยํ;

สมฺมนฺนุ’ปาลิเถโร จ, วิสฺสชฺเชตุํ ตเมว ตุฯ

[32]

เถราสเน นิสีทิตฺวา, วินยํ ตมปุจฺฉิ โส;

ธมฺมาสเน นิสีทิตฺวา, วิสฺสชฺเชสิ ตเมว โสฯ

[33]

วินยญฺญูนมคฺเคน, วิสฺสชฺชิตกเมน เต;

สพฺเพ สชฺฌายมกรุํ, วินยํ นยโกวิทาฯ

[34]

อคฺคํ พหุสฺสุตาทีนํ, โกสารกฺขํ มเหสิโน;

สมฺมนฺนิตฺวาน อตฺตานํ, เถโร ธมฺมมปุจฺฉิ โสฯ

[35]

ตถา สมฺมนฺนิย’ตฺตานํ, ธมฺมาสนาคโต สยํ;

วิสฺสชฺเชสิ ตมานนฺท-ตฺเถโร ธมฺมมเสสโตฯ

[36]

เวเทหมุนินา เตน, วิสฺสชฺชิตกเมน เต;

สพฺเพ สชฺฌายมกรุํ, ธมฺมํ ธมฺมตฺถโกวิทาฯ

[37]

เอวํ สตฺตหิ มาเสหิ, ธมฺมสํคีติ นิฏฺฐิตา;

สพฺพโลกหิตตฺถาย, สพฺพโลกหิ เตหิ สาฯ

[38]

มหากสฺสปเถเรน, อิทํ สุคตสาสนํ;

ปญฺจวสฺสสหสฺสานิ, สมตฺถํ วตฺตเน กตํฯ

[39]

อตีว ชาตปาโมชฺชา, สนฺธารกชลนฺติกา;

สํคีติปริโยสาเน, ฉทฺธากมฺปิ มหามหีฯ

[40]

อจฺฉริยานิ จา’เหสุํ, โลเกเนกานิเนกธา;

เถเรเหว กตตฺตา จ, เถริยายํ ปรมฺปราฯ

[41]

ปฐมํ สงฺคหํ กตฺวา, สพฺพโลกหิตํ พหุํ;

เต ยาวตายุกํ ฐตฺวา, เถรา สพฺเพปิ นิพฺพุตาฯ

[42]

เถรา’ปิ เต มติปทีปหตนฺธการา,

โลกนฺธการหนนมฺหิ มหาปทีปา;

นิพฺพาปิตา มรณโฆรมหานิเลน,

เตนาปิ ชีวิตมทํ มติมา ชเหยฺยาติฯ

สุชนปฺปสาทํสํเวคตฺถาย กเต มหาวํเส

ปฐมธมฺมสํคีตินาม

ตติโย ปริจฺเฉโทฯ

จตุตฺถ ปริจฺเฉท

ทุติย สํคีติ

[1]

อชาตสตฺตุ ปุตฺโต ตํ, ฆาเตตฺวา’ทายิ ภทฺทโก;

รชฺชํ โสฬสวสฺสานิ, กาเรสิ มิตฺตทูภิโกฯ

[2]

อุทยภทฺท ปุตฺโต ตํ, ฆาเตตฺวา อนุรุทฺธโก;

อนุรุทฺธสฺส ปุตฺโต ตํ, ฆาเตตฺวา มุณฺฑนามโกฯ

[3]

มิตฺตทฺทุโน ทุมฺมติโน, เต’ปิ รชฺชมการยุํ;

เตสํ อุภินฺนํ รชฺเชสุ, อฏฺฐวสฺสาน’ติกฺกมุํฯ

[4]

มุณฺฑสฺส ปุตฺโต ปิตรํ, ฆาเตตฺวา นาคทาสโก;

จตุวีสติวสฺสานิ, รชฺชํ กาเรสิ ปาปโกฯ

[5]

ปิตุฆาตกวํโส’ย, มีติกุทฺธา’ถ นาครา;

นาคทาสก ราชานํ, อปเนตฺวา สมาคตาฯ

[6]

สุสุนาโคติ ปญฺญาตํ, อมจฺจํ สาธุสมฺมตํ;

รชฺเช สมภิสิญฺชิํสุ, สพฺเพสํ หิตมานสาฯ

[7]